Առաքելություն

Հանգուցալուծման ճանապարհը

ԱՄՆ հիմնադիր հայրերից Ջեյմս Մեդիսոնն ասում է, «Եթե մարդիկ հրեշտակ լինեին, ապա ոչ մի կառավարություն անհրաժեշտ չէր լինի: Եթե հրեշտակները կառավարեին մարդկանց, ապա կառավարության վրա ոչ արտաքին, ոչ ներքին վերահսկողության անհրաժեշտություն չէր լինի»։

Մարդիկ սխալական են, խոցելի գայթակղությունների հանդեպ, հակված են ծուլության։ Մարդիկ սեփական ջանքերով սեփական երկիրը կառուցելու փոխարեն սպասում են «փրկիչների», ովքեր «կզոհաբերվեն» իրենց փխարեն, կամ կկառուցեն «Ավետյաց երկիր» որտեղ ոչինչ չանելով բոլորը կապրեն կուշտ և երջանիկ։ Գործնականում այդպես չի լինում։ Ավելի պրագմատիկները փնտրում են արտաքին հովանավոր, և սպասում, թե ով պիտի իր ժողովրդից կտրելով միլիարդավոր դոլլարներ տա, որպեսզի «հալածված ժողովուրդներն» առանց մեծ ջանքերի ձրի ապրուստ գտնեն, որպես «պատմական արդարության» հաստատում։ Սա ևս «գավառական խորամանկության» ձախողված ինքնախաբեություն է։

Լուծումը մեկն է՝ աշխատանք, ջանք, եռանդ, կրթություն, չարչարանք, և այս ամենը բարձր կազմակերպվածության պայմաններում։ Ամեն լավ բան հնարավոր է, սակայն «Հեշտ չի՛ լինելու»։